Kuimarika kwa mapato ya kampuni ya Vodacom kumeiwezesha kupata ya faida ya Sh170.24 bilioni hivyo kuwa na uwezo wa kutoa gawiwo la Sh83.81 kwa kila mwanahisa.
Faida hiyo imepatikana katika mwaka unaoishia Machi 31, 2018 huku maeneo matatu yakibainishwa kuchangia ufanisi huo.
Mkurugenzi mkuu wa Vodacom, Ian Ferrao amesema maeneo yaliyopata faida hiyo ni katika huduma ambako faida imeongezeka kwa asilimia 5.9 na kufika Sh966.3 bilioni wakati yale ya M-Pesa yakiimarika kwa asilimia 16.7 hadi Sh291.2 bilioni.
Pia, mauzo ya data yakiongezeka kwa asilimia 34.7 na kufikisha Sh141.6 bilioni.
“Mafanikio hayo yametokana na huduma bora tunazozitoa kwa wateja na kuimarika kwa matumizi ya data na mfumo unaoboreshwa kila siku wa fedha mtandaoni.” amesema Ferrao.
