Kipigo cha bao 2 kwa 0 toka kwa Tottenham kimezidi kuididimiza Arsenal katika msimamo wa Epl msimu huu na kuzidi kuondoa matumaini ya Arsenal kucheza Champions league msimu ujao.
Lakini Arsenal kutocheza Champions League sio habari chungu sana kwa kuwa tuliitarajia toka siku nyingi, habari chungu sana kwa Arsenal ni kumaliza ligi chini ya Tottenham Hostpur.
Klabu hizi ni pinzani sana kutokana na ujirani wao katika jiji la London lakini Tottenham hawajawahi kumaliza ligi juu ya Arsenal ndani ya miaka 22 iliyopita lakini msimu huu hilo linaonekana kutokea.
Mashabiki wa Tottenham wameanza kuwa kero kubwa kwa Arsenal nchini Uingereza na ndio maana haikuwa ajabu kwa wao kupigana kabla na baada ya mchezo wao.
Kocha Arsene Wenger anaelewa kuhusu mashabiki wa Arsenal wanavyojisikia kutokana na Tottenham kumaliza msimu juu yao, na Wenger anajua mashabiki wanaumia sana.
Baada ya mchezo kati yao Wenger alisema “niwapongeze kwa hilo la kumaliza juu yetu lakini sisi hatujaingia katika ligi kwa ajili ya hilo, sisi nia yetu ilikuwa kombe”
Wenger amesisitiza kwamba hata siku moja wao kama Arsenal hawawezi jifananisha na Tottenham bali wao huwa wanajilinganisha na pale walipotaka kuwa msimu huu.
Naye kocha wa Tottenham Hotspur Mauricio Pochettino ambaye mashabiki wa Tot walikuwa wakiimba nyimbo za kumsifu kwa kuimaliza Arsenal na kukaa juu yao amesema anafuraha kuwapa furaha mashabiki.
“Kuwa juu ya Arsenal kwa mara ya kwanza ndani ya miaka 22 ni jambo la furaha kwa mashabiki zetu na hata sisi pia lakini nia yetu haswa ni kutaka ubingwa wa Epl msimu huu” alisema Pochettino.
Pochettino pia hakuishia hapo bali amelalamikia upangwaji wa ratiba ya ligi ya Epl akisema anadhani kwa ilipofikia ni vyema kama ingekuwa timu zinazofukuzia ubingwa zikawa zinacheza kwa wakati mmoja.
