Wanariadha watatu wa Tanzania leo wanatupa karata ya mwisho ya kusaka medali katika Michezo ya 31 ya Olimpiki wakati watakapokimbia katika mbio za marathon kwa upande wa wanaume.
Tayari Tanzania imeshindwa kupata medali katika michezo ya judo, kuogelea na marathon kwa wanawake. Wanariadha watakaotimua vumbi leo ni pamoja na Alphonce Felix, Fabian Joseph pamoja na Said Makula wakiwa chini ya kocha Francis John.
Mbio hizo za marathon zinafanyika ikiwa ndio mwisho wa michezo hiyo ya 31 ya Olimpiki iliyoanza Agosti 5 mwaka huu na kushirikisha jumla ya mataifa 207, wachezaji zaidi ya 11,000 na michezo 28 ilishindaniwa.
Kwa mara ya mwisho Tanzania ilitwaa medali katika Michezo ya Olimpiki mwaka 1980 ilipofanyikia Moscow, Urusi kupitia kwa Filbert Bayi na Suleiman Nyambui.
