Kocha msaidizi wa Mwadui FC Khalid Adam amesema anaiomba TFF kubalidi uwanja wa nyumbani wa African Lyon (uwanja wa Uhuru) wenye nyasi bandia ambapo kutokana na hali ya hewa ya joto ya jiji la Dar es Salaam kusababisha joto zaidi uwanjani kutokana na uwanja huo kuwa na nyasi za bandia.
Mwadui ilichezea kichapo cha goli 1-0 kutoka kwa African Lyon kwenye mchezo wao wa ligi uliochezwa kwenye uwanja wa Uhuru jana Jumapili March 5, 2017.
“Nitoe ombi au ushauri kwa TFF, kutokana na hali ya hewa ya sasa hivi ningeomba uwanja huu tusiwe tunautumia kwa sababu sisi tumetoka sehemu yenye hali ya hewa ya baridi lakini huku kuna joto halafu nyasi bandia zinaongeza joto pia.”
“Kwa hiyo kwa kipindi hiki mechi hizi ziwe zinatazamwa pia kwa sababu nyasi za bandia wakati wa joto na zenyewe zinazidisha joto, lakini sisemi zisitumike. Ni vizuri tukacheza jioni kabisa wakati hali ya hewa imetulia kidogo.”
Kocha huyo amesema nafasi yao sio nzuri sana wala sio mbaya sana, bado wana michezo mingine mbele watajitahidi ili waweze kufanya vizuri zaidi.
Mwadui ipo nafasi ya sita ikiwa na pointi 31 baada ya kucheza michezo 25 hadi sasa mchezo mmoja mbele zaidi ya timu nyingine.
